Tumanggap kamakailan ng mga ulat mula sa bayan ng Siniloan ang Laguna PNP at Provincial Peace and Order Council (PPOC) hinggil sa sindikatong nambibiktima sa mga mamamayan ng Siniloan at karatig-bayan sa pamamagitan ng pagkuha ng bank accounts ng mga biktima. Ayon sa ulat, tinatawagan ng mga suspek ang mga biktima na may mga kamag-anak sa ibang bansa sa kani-kanilang tahanan upang sabihing nagkaroon ng problema ang kanilang mga mahal sa buhay at nangangailangan ng tulong pinansyal. Hinihingi din ng tumawag na suspek and bank account ng biktima upang sabihing handa silang tulungan.

     Naalarma ang mga mamamayan ng Siniloan at karatig-bayan sapagkat alam ng mga tumatawag na suspek ang lahat ng impormasyon hinggil sa kanilang pamilya. Mayroon ding mga ulat na ang ibang impormasyon ay kinukuha ng mga suspek sa iba rin mamamayan ng Siniloan at karatig-bayan na kanilang titawagan. Sa nasabing mga insidente, nanawagan ang mga mamamayan ng Siniloan sa Laguna PNP at PPOC kung kaya nilang ma-trace ang mga tawag sa kumpanya ng teleponong DIGITEL o CRUZTELCO sa dahilang karamihan sa mga taga-Siniloan at karatig-bayan ay subscribers ng nasabing telephone companies.