Pinabulaanan ng mga opisyal ng Pamahalaang Panlalawigan ng Laguna sa pamumuno ni Gob. Teresita “Ningning” S. Lazaro ang napabalitang outbreak o pagkalat ng sakit na meningococcemia na napaulat sa lalawigan. Kumalat ang espekulasyon dahil sa biglaang pagkamatay diumano ng isang batang 2 taon at 8 buwan sa Panlalawigang Pagamutan sa Sta. Cruz sa sakit na meningococcemia. Sa pangyayaring ito ay agad na naalarma ang lahat lalo na ang mga taga-Brgy. Banca-Banca sa Victoria na kung saan nagmula ang pasyente.

     Sa pahayag ni Dra. Corazon Mendoza, Chief of Clinic ng Pediatrician Division ng nasabing pagamutan na tumingin sa pasyenteng si F.N. (initials ng bata), ipinasok ang bata noong Disyembre 31, 2005 sa ganap na ika-2 ng hapon. Bukod sa lagnat at sa kahirapang huminga kasama na ang kombulsyon, kinakitaan din ang bata ng mga patse-patse sa katawan o “rashes”. Sa pagtanggap nila kay F.N ay agad nila itong binigyan ng karampatang lunas (aggressive treatment), at makalipas ang 2 oras at 35 minuto ay namatay ang bata.

     Dahil sa pangyayari ay agad na nagsagawa ang Provincial Health Office, na nakabase sa Pagamutang Panlalawigan sa Laguna ng imbestigasyon at case visitation sa Brgy. Banca-Banca sa Victoria katulong ang mga opisyal at Rural Health Unit (RHU) Officers ng nasabing bayan. At upang maagapan ang sakit ay namahagi sila ng mga antibiotics sa mga residenteng nakatira malapit sa tinuluyan ng pamilya ng bata.

     Sa pagsusuri ni Dra. Mendoza, kinumpirmang niyang negatibo sa meningococcemia ang ikinamatay ng bata. Sa diagnosis lumabas na DIC o Disseminated Intravascular Coogolopathy, Septicemia, Upper Respiratory Track Infection ang ikinamatay ni F.N.

     Ayon din sa impormasyon, hindi tubong-Victoria ang pamilya ni F.N. Taga- Bacoor, Cavite ito at umuwi lamang sa Victoria ang mag-anak upang dumalo sa reunion ng isang kamag-anak. Dumating din ang bata na may lagnat na at ubo. # (PIO-Laguna)